Народната банка и Владата на Северна Македонија ги ревидираа нагоре инфлациските проекции за 2025 година, предупредувајќи дека растот на цените на енергенсите и храната ќе продолжи да го зголемува притисокот врз животниот стандард на граѓаните.
Централната банка во четвртокот соопшти дека очекува инфлацијата во 2025 година да достигне 3%, што е зголемување од претходната прогноза од 2,5% дадена во октомври.
„Ревизијата ги одразува повисоките остварувања во првиот квартал, како и зголемените проценки за цените на суровата нафта и основните прехранбени производи на светските берзи,“ соопшти Народната банка.
Ден претходно, министерството за финансии преку ребалансот на буџетот ја ревидираше владината прогноза за инфлација од 2,2% на 2,8%. Министерката Гордана Димитриеска-Кочоска изјави дека цените на живот ќе продолжат да растат до крајот на годината.
Економистите сметаат дека ваквиот раст е очекуван, не само поради глобалните трендови, туку и поради, како што велат, неефикасноста на домашните економски мерки.
„Има механизми за справување со инфлацијата преку монетарна и фискална политика. Но фискалната политика со години не покажува резултати, сивата економија останува проблем“, изјави економистот Абил Бауш за ТВ24, додавајќи дека евентуално зголемување на каматните стапки може да биде следниот чекор на Централната банка.
Цените на храната се повторно во фокусот, откако воената ескалација меѓу Иран и Израел повторно ги зголеми цените на енергенсите. Претседателот на Регулаторната комисија за енергетика, Марко Бислимовски, предупреди дека нема оправдување за ново покачување на цените на прехранбените производи, кои, според него, останале високи и по стабилизирањето на цените на струјата и нафтата.
„Храната значително поскапе во време на енергетската криза, но и покрај стабилизацијата на пазарите, тие цени не се вратија. Затоа сега нема оправдување за нов раст“, рече Бислимовски.