На половина пат е шестиот закон за амнестија во државава, колку што имаше од осамостојувањето на државата досега. Затворите се уште се преполни, условите во нив – нехумани, а ресоцијализацијата и рехабилитацијата на затворениците е „заглавена“ кај недостигот на кадар да работи со нив. Што ќе смени последниот Закон за амнестија?
Затворениците штo ќе излезат од другата страна на затворската капија, откако во Собранието ќе помине Законот за амнестија, ќе бидат слободни граѓани. Никој нема да го надгледува како ќе се однесуваат, затоа што државата нуди рехабилитација и ресоцијализација само во затворите, а не подлежат ни под системот на пробација – каде се надгледува само спроведувањето на алтернативните мерки и условниот отпуст.
Закон за амнестија предложи Министерството за правда, поради потреба од ресоцијализација на определен број осудени лица, пренатрупаност на затворите и лоши услови за престој во нив.
„Амнестијата е начин затворениците помалку да се криминализираат внатре во затворите – веројатно е тој што ќе влезе во затвор со пресуда од една година, ако државата не му овозможи рехабилитација, да се врати дома како тежок криминалец“, објаснуваше на брифинг министерот за правда, Кренар Лога.