„Тензиите во Србија растат околу можното членство на Косово во Советот на Европа. Можно е Западен Балкан да биде втор фронт за Русија против западниот свет. Зборовите на Вучиќ се повеќе психолошки притисок да се запре членството на Косово во Советот на Европа. Србија има воен потенцијал поради воените подароци од рускиот претседател. Нашиот регион повторно влегува во тензија, која е стимулирана однадвор – од Русија. Уште еднаш некој не влече во сивата зона на Балканот Зборовите на Вучиќ не треба да се потценуваат, Бугарија треба внимателно да гледа што се случува во Србија“, вели аналитичарот Николај Крастев во интервју за бугарскиот медиум Фрог Нјуз, пренесува Инбокс7.
Николај Крастев, новинар од БНТ, автор на документарниот филм „Другата Русија“ и поранешен дописник на БНР од Белград и Москва, кој известуваше за голем број воени конфликти во поранешна Југославија. Крастев е автор и на филмот „Третиот куршум“ , снимен 20 години по атентатот на реформистичкиот премиер Зоран Ѓинѓиќ.
„Српскиот претседател Александар Вучиќ многу добро ги поигрува стравовите и на Србите во Србија, на Европејците кои излегуваат на избори за само неколку месеци и на Американците кои исто така излегуваат на избори на крајот на годината. Не може да се негира дека Вучиќ знае да го најде вистинскиот момент кога да ги искористи стравовите на прилично моќните центри. Зад него, секако, е Русија, која веројатно му дава совети и го охрабрува во овие обиди да освои повеќе поени за Србија и за српскиот народ, без разлика дали живее во границите на Србија или во границите на соседните балкански земји“, рекол Крастев.
Косово ја поднесе својата апликација за членство во Советот на Европа пред речиси две години. Се очекува Советот на Европа многу брзо да донесе одлука за членство. Според Крастев, Србија го сфаќа ова како големо понижување.
„Србија е лута од потегот, веројатно напуштање на оваа организација и дополнително изолирање во знак на протест поради влезот на Косово“, вели тој.
Крастев оценува дека Србија има ресурси да поттикне нова војна во регионот, и покрај смирувачките анализи на некои западноевропски колеги дека тоа не може да се направи.
„Србија во последните речиси 5 години доби многу воени подароци од рускиот претседател. Некои од нив го преминале и бугарскиот воздушен простор за да стигнат до Србија. Србија има воен потенцијал, тоа не треба да се исклучи“, смета Крастев.
За него е загрижувачки што тензијата во регионот е многу силна.
„Во Босна и Херцеговина тензијата е од една страна, меѓу високиот претставник на меѓународната заедница во Босна и Херцеговина и лидерите на босанските Срби, а од друга, меѓу лидерите на босанските Срби и босанските муслимани. Србија постојано повторуваше дека ќе го заштити српскиот народ што живее во Босна и Херцеговина. Сето ова дава причина да се зборува за тензија која не треба да се потцени. Сосема е можно Србија да им даде поддршка во една или друга форма на босанските Срби“, вели Крастев.
Тој предупредува дека во моментов за Западен Балкан се исцртуваат многу мрачни, катастрофални сценарија.
„Бидејќи повеќе сме фокусирани на други точки и други светски конфликти, не се посветува толку внимание на оваа криза. Но, вистината е дека она што се случува и се очекува да се случи на Западен Балкан не е за потценување. Мора да бидеме многу внимателни. Не само Бугарија, туку и НАТО треба да го зајакне своето присуство во регионот за да се избегнат какви било обиди за ескалација на тензиите“, вели Крастев.