Демократската унија за интеграција (ДУИ) изрази длабока загриженост и остро го осуди апсењето на државјанинот на Република Косово, Емин Бајрами, на 14 февруари 2025 година, на граничниот премин Блаце – Хан Елезит, врз основа на потерница издадена од Србија преку Интерпол.
ДУИ ова го оцени како „уште еден неприфатлив случај“ на спроведување на „фабрикувани потерници“ од Србија од страна на Министерството за внатрешни работи на Северна Македонија, кое, според партијата, продолжува да постапува без никаква верификација, загрозувајќи ги правата и слободите на косовските граѓани.
„Уште позагрижувачки е фактот што јавноста беше држена во неизвесност повеќе од 10 часа во врска со ова приведување, што дополнително ги засилува сомнежите за вистинските намери на овие мерки“, се вели во соопштението на ДУИ.
Партијата оценува дека ваквите „повторувачки и неправедни апсења“ се случуваат во период кога Северна Македонија ја води „немоќна влада без етнички легитимитет“. Според ДУИ, албанските претставници во оваа влада „не само што немаат влијание, туку покажуваат и неспособност да ги заштитат интересите на Албанците во и надвор од земјата“.
ДУИ нагласува дека потерниците издадени од Србија преку Интерпол не треба „слепо да се спроведуваат“ од страна на институциите на Северна Македонија. Партијата тврди дека во периодот кога имала „легитимно албанско претставување во владата“, спречила вакви случаи и обезбедила заштита на правата на косовските граѓани.
ДУИ бара „итно и безусловно ослободување“ на Бајрами и ја повикува Владата на Северна Македонија „итно да ја преиспита својата практика на извршување на српските потерници“.
„Не смееме да дозволиме нашата држава да стане инструмент на политиките на Белград на штета на албанските граѓани“, се вели во реакцијата на ДУИ.