Владата на Северна Македонија ги отфрли тврдењата на опозицијата дека надворешната политика на земјата се движи во неодреден правец, порачувајќи дека останува посветена на европската интеграција, иако ја зајакнува соработката со новата американска администрација.
Министерот за надворешни работи Тимчо Муцунски, одговарајќи пред парламентот, нагласи дека стратешките приоритети на земјата остануваат непроменети – членството во НАТО, усогласеноста со заедничката надворешна и безбедносна политика на ЕУ и стратешкото партнерство со САД.
„Ниту една од овие теми не е помалку битна од другата. Треба подеднакво да ги гледаме, а не да бираме страна“, изјави Муцунски.
Муцунски денеска се сретна со американската амбасадорка во Скопје, каде што, според неговиот кабинет, било потврдено „силното и стратешко партнерство меѓу двете земји“.
Опозицијата ја искористи денешната собраниска седница за да го критикува воздржаниот став на Северна Македонија при гласањето во ОН за таканаречената европска резолуција за Украина.
„Ова ја отвора дилемата: дали Северна Македонија останува на европскиот пат или се движи кон геополитичка изолација?“ изјави Славјанка Петровска од опозициската СДСМ.
Премиерот Христијан Мицковски ја бранеше одлуката, тврдејќи дека била заснована на проценката дека во рамките на ЕУ не постоел единствен став по прашањето.
„Затоа беше логично да ја поддржиме резолуцијата предложена од САД“, рече Мицковски, додавајќи дека и некои земји-членки на ЕУ не гласале против американската иницијатива.
Некои европски дипломати ја изразија својата загриженост. Францускиот амбасадор во Скопје, Кристоф Ле Риголер, изјави дека гласањето на Северна Македонија било „неочекувано“.
Во својот обраќање во парламентот, Мицковски ги истакна позитивните аспекти на односите со новата американска администрација, повикувајќи се на говорот на потпретседателот Џеј Ди Венс како „историски“ и како предвесник на глобални промени.
„Светот се менува, без разлика дали некој тоа го сака или не“, рече Мицковски, алудирајќи на поинаквиот пристап на Вашингтон кон прашањата како руската инвазија врз Украина и конфликтот на Блискиот Исток.
Премиерот во изминатиот месец двапати ја посети американската престолнина, прво за инаугурацијата на претседателот Доналд Трамп, а потоа за да учествува на Конференцијата на конзервативната политичка акција. Опозицијата, иако ги поздрави овие средби, постави прашање за конкретните придобивки што земјата ги има од нив.