Потпретседателот на Демократската унија за интеграција (ДУИ), Арбр Адеми, во понеделникот изјави дека партијата во наредните денови ќе објави документација и докази за одговорноста за трагедијата во Кочани, во која животот го загубија голем број луѓе.
„Одговорност мора да има и оваа трагедија не смее да се повтори. Ќе поднесеме пријава до Јавното обвинителство за покренување постапка за кривична одговорност против надлежните лица и институции,“ рече Адеми на прес-конференција во партиското седиште во Скопје.
Адеми истакна дека Министерството за економија во март 2024 година не издало лиценца за објектот каде што се случи трагедијата, бидејќи не ги исполнувал законските услови.
„Зошто објектот функционирал без лиценца до март 2025 година треба да се истражи, а одговорноста да се побара таму каде што треба,“ додаде тој.
Градоначалникот на Општина Кочани, Љупчо Папазов, според Адеми, знаел или требало да знае дека фирмата “ММММ Кафе ДООЕЛ Кочани” нема лиценца за работа.
Адеми ги отфрли наводите дека некој од Министерството за економија издал лажна лиценца, нарекувајќи ги тие тврдења „целосна конструкција“.
„Министерството не издаде лиценца затоа што не беа исполнети минимално-техничките услови. Ако некој фалсификувал документ надвор од институцијата, одговорноста е на поединците што го сториле тоа,“ рече Адеми.
Тој ја обвини владејачката ВМРО-ДПМНЕ дека се обидува да ја дефокусира јавноста и да избегне одговорност.
„Несреќата се случи во време кога ВМРО-ДПМНЕ има целосна контрола врз институциите, со градоначалник и началник на полицијата во Кочани од нивните редови. Одговорност мора да има,“ заклучи Адеми.