Министерот за здравство и еден од лидерите на коалицијата ВЛЕН, Арбен Таравари, изјави во интервју за „360 степени“ дека партиите на Албанците во Владата функционираат бавно и недоволно ефикасно, што, според него, се одразува негативно на перцепцијата на јавноста.
„Тоа не е до премиерот Христијан Мицкоски, туку до нас. Неусогласеноста е очигледна и оддалеку се забележува дека функционираме премногу бавно. Според анкетите што ги спроведовме, околу 70% од Албанците сметаат дека ВЛЕН не функционира како што треба и дека претставувањето на Албанците во Владата е незадоволително“, рече Таравари.
Тој појасни дека зборува за квалитетот, а не за квантитетот на претставеноста.
„Ако гледаме по бројки – министри, директори – сликата изгледа добро. Но, квалитативно, не е на посакуваното ниво. Ова е општ впечаток меѓу Албанците“, додаде тој.
Внатрешни несогласувања и изборна стратегија
Таравари ги изрази овие ставови во време на сè погласни шпекулации дека би можел да ја напушти ВЛЕН и да ѝ се приклучи на Демократската унија за интеграција (ДУИ). Претстојните локални избори, рече тој, ќе бидат клучен тест за коалицијата, која сè уште не постигнала договор за заеднички настап.
„Минатата година се договоривме да функционираме како четири посебни партии до локалните избори, а потоа да се обидеме да станеме една партија. Но, тогаш реков – ако одиме како четири партии, логично е и советничките листи да бидат посебни. Исклучително е тешко да се усогласат повеќе партии околу заедничка листа“, изјави Таравари.
Односите со Косово и Албанија
На прашање за неодамнешната средба на лидерите на ВЛЕН со косовскиот премиер Албин Курти, Таравари ја опиша како коректна и ги отфрли медиумските шпекулации за несогласувања.
Тој исто така негираше дека неговите чекори се инспирирани од албанскиот премиер Еди Рама и потенцираше дека статусот на Албанците во Северна Македонија е подобрен.
„Никогаш досега не сме имале толку коректен однос од страна на премиерот. Но, подолу во хиерархијата – кај директорите, заменик-директорите, заменик-министрите – нештата не функционираат како што треба“, рече Таравари.
Во однос на иднината на ВЛЕН, тој останува скептичен дека коалицијата може да се трансформира во единствена партија.
„Посакувам да најдеме формула за заеднички настап на изборите. Но, мојата интуиција ми вели дека одржливоста на ВЛЕН како една партија по изборите е речиси невозможна мисија. Можеби грешам, времето ќе покаже“, вели Таравари.