Соединетите Американски Држави внимателно ги следат процедурите во Собранието и изјавите поврзани со изгласаните интерпелации за петте членови на Судскиот совет, изјави во средата американската амбасадорка во Северна Македонија, Анџела Агелер.
“Не можам да ги коментирам. Многу внимателно ги следиме процедурите во Собранието и изјавите во врска со изгласаните интерпелации за петте членови на Судскиот совет. Најважно е процесот да се одвива на јасен и транспарентен начин за сите што го следат”, рече Агелер на настанот по повод предавање на акредитацијата од Меѓународната асоцијација на директори на полициски академии за стандарди и обуки (ИАДЛЕСТ) во Центарот за обука на МВР во Идризово.
Во врска со одбиеното барање за виза на министерот за труд и социјална политика, демографија и млади, Фатмир Лимани, Агелер изјави дека САД имаат строги закони за приватност и дека не може да коментира индивидуални случаи.
“Имаме многу строги закони за приватност во Соединетите Американски Држави и затоа не можам да коментирам прашања поврзани со визи за ниту еден апликант. Би ве упатила кај министерот да ви каже што се случило. Секој апликант за американска виза е запознаен со процесот, а доколку има нешто дополнително, тоа исто така му се објаснува”, рече Агелер.