Граѓанската иницијатива „Кој е следен?“ најави протест за недела, 2 февруари, во 17:00 часот на булевар Партизански Одреди, кај Универзална сала, во знак на револт против, како што велат, повторувачките случаи на неконтролирано возење, неказнивост и загуба на човечки животи.
„Случајот со Фросина Кулакова не е изолиран инцидент. Со години се соочуваме со исти проблеми – недостаток на санкции и систем што не гарантира безбедност“, се вели во соопштението на иницијативата.
Организаторите посочуваат дека системот не нуди доволна поддршка за децата и младите, што доведува до нивна маргинализација и избор на ризични животни патеки. „Институциите не се координирани, а последиците се сè почести фатални исходи“, се додава во соопштението.
Протестот има за цел да привлече внимание кон три клучни проблеми:
1. Неефикасноста на системот за заштита на децата и младите кои се во судир со законот;
2. Недостатокот на безбедност во урбаните средини;
3. Глорификацијата на девијантното однесување.
„Алките во системот не функционираат – младите во ризик не се идентификуваат навреме, а оние кои веќе се препознаени не добиваат соодветна поддршка за да се изградат како одговорни граѓани“, предупредуваат организаторите.
Тие исто така нагласуваат дека урбаната инфраструктура не гарантира безбедност за граѓаните и дека е неопходно подигнување на јавната свест за последиците од толерирањето на неказнивоста.
„Градовите мора да обезбедат безбедни услови за живот. Клучно е јавно да се осуди величањето на девијантното однесување и да се информира јавноста за ризиците што произлегуваат од заобиколувањето на правилата“, велат од „Кој е следен?“.