Демократската унија за интеграција (ДУИ) ја изрази својата целосна поддршка за предложената Директива на Европската комисија за борба против корупцијата, која има за цел модернизација на постојната законска рамка на ЕУ во оваа област.
„Оваа иницијатива е во согласност со нашата посветеност на интегритетот и транспарентноста, особено во контекст на тековните внатрешни реформи, кои вклучуваат верификација на функционерите и унапредување на високите стандарди на интегритет кај партиските претставници,“ соопшти ДУИ.
Според партијата, предложената директива претставува значаен чекор напред во спречувањето и санкционирањето на корупцијата, како и во градењето култура на интегритет.
Директивата предвидува формирање специјализирани тела со соодветни ресурси и обука за ефикасно спречување и гонење на корупцијата. Таа пропишува транспарентност во јавниот сектор преку отворен пристап до информации, јасни регулативи за управување со конфликтот на интереси и проверка на имотната состојба на јавните функционери.
ДУИ нагласи дека поддржува усогласување на дефинициите за коруптивни дела, вклучувајќи мито, злоупотреба на функцијата, трговија со влијание, попречување на правдата и незаконско богатење. Директивата предвидува и усогласување на кривичните санкции за физички и правни лица, како и воспоставување јасни насоки за олеснителни и отежнувачки околности.
ДУИ ја истакна важноста на ефикасните истраги и судски постапки, повикувајќи на опремување на истражните органи со неопходните механизми за справување со корупцијата. „Клучно е да се отстранат привилегиите и имунитетите кои можат да го попречат правосудниот процес, како и да се воведат минимални правила за осигурување доволен временски рок за гонење на коруптивните дела,“ стои во соопштението на партијата.
ДУИ исто така потенцира дека поддршката за оваа директива ја нагласува нејзината посветеност кон промовирање на култура на интегритет и отчетност, не само внатре во партијата, туку и во поширокиот политички контекст.
Партијата верува дека усвојувањето на директивата ќе ги усогласи стандардите за борба против корупцијата низ целата ЕУ и ќе ја зајакне способноста за справување со корупцијата, вклучувајќи и прекугранични случаи.
ДУИ останува посветена на создавање транспарентна и одговорна владејачка рамка во Северна Македонија и пошироко, се наведува во соопштението.