Конститутивната седница на Собранието на Косово не успеа да се финализира во вторникот, бидејќи не беше усвоен извештајот на Комисијата за верификација на кворумот и мандатите. Опозициските партии – Демократската партија на Косово (ДПК), Демократската лига на Косово (ДЛК) и Алијансата за иднината на Косово (ААК) – гласаа против извештајот, додека Српската листа беше воздржана.
В.д. премиерот, Албин Курти, во вторникот му поднесе писмо за оставка на претседателот на Собранието, Глаук Коњуфца, во име на себе и на владата. Во писмото се нагласува дека оставките се дадени со цел да се овозможи давање заклетва како пратеници.
Во реакција на Facebook, Курти го нарече негласањето на извештајот „институционален напад внатре во Републиката Косово“ и ја обвини опозицијата дека го поткопува демократскиот процес. Тој рече дека гласот против извештајот за верификација на мандатите е чин против конституирањето на новиот парламентарен состав.
Пратеничката на ВВ, Мимоза Кусари-Лила, изјави дека опозицијата гласала и против сопствените мандати. Таа ги обвини опозициските партии дека не го прифаќаат изборниот резултат.
пратеникот на ВВ, Фатон Пеќи, рече дека се подготвени да го објават кандидатот за претседател на Собранието штом мандатите бидат верификувани. Тој нагласи дека оставките на министрите се дадени, но нивното итно заминување од функциите би создало „институционален јаз“.
Претседателката Османи не е известена за прекинот
Во меѓувреме, Претседателството потврди дека не добило официјално известување од Собранието за нова конститутивна седница. „Досега не е пристигнато ниту едно писмо од Собранието. Пред одговорот треба да стигне прашањето“, изјави Беким Купина, медиумски советник на претседателката Вјоса Османи.
Според Деловникот на Собранието, прекините за време на конститутивната седница не смеат да траат подолго од 48 часа. Претседавачот на седницата, Авни Дехари, изјави дека поради неусвојувањето на извештајот седницата ќе биде прекината и претседателката ќе биде известена за понатамошните чекори.
Дали Курти купува време?
Претседателот на ДПК, Мемли Красниќи, изјави дека извештајот е противуставен, додека претставникот на ДЛК во Комисијата, Арменд Земај, рече дека документацијата за оставката на премиерот и министрите кои биле избрани како пратеници не била навреме споделена.
Красниќи изјави дека нема да дозволат новата легислатура да започне со „уставни прекршувања“, критикувајќи го ВВ за погрешно правно управување во изминатите четири години.
ДЛК ја обвини владејачката партија, Движењето Самоопределување (ВВ), за намерно блокирање на процесот. Претседателот на ДЛК, Лумир Абдиџику, рече дека ВВ создава опасен преседан и дека Собранието треба повторно да се свика што е можно побрзо.
„Го видовме на седницата, 52 поддржувачи на партија која тврди дека ги има бројките. Поднесете оставка, дојдете на седница, проблемот веднаш се решава“, рече Абдиџику.
Пратеничката на ДЛК, Хикмете Бајрами, потврди дека таа партија нема да го поддржи предлогот на ВВ за претседател на Собранието, барајќи предлагачката партија да обезбеди и потребното мнозинство.
Претседателот на ААК, Рамуш Харадинај, изјави дека опозицијата нема да учествува во гласањето за претседател на Собранието, задржувајќи заеднички став со ДПК и ДЛК во оваа фаза од конститутивниот процес. На оваа седница пратениците од деветтата легислатура ќе положат заклетва, а на дневен ред е и изборот на претседател на Собранието. Името на кандидатот сè уште не го објавила најголемата партија, ВВ. Партијата победничка на изборите има право да го предложи претседателот на Собранието.
Малцинставата немаат договор со Курти
Во меѓувреме, Ветон Бериља од Египќанската либерална партија изјави дека немаат коалициски договор, но нема да го блокираат формирањето на институциите. „Никогаш не сме биле пречка“, рече тој.
Од редовите на српската заедница, претседателот на Партијата за слобода, правда и опстанок, Ненад Рашиќ, потврди дека српската заедница ќе биде претставена во новата влада и дека ќе ја поддржи нејзината формација.
Движењето Самоопределување обезбеди 48 места во Собранието и му се потребни најмалку 61 за формирање мнозинство. Досега не е официјализиран договор со албанските партии или со претставници на не-српските заедници.
Курти нема мнозинство
Албин Курти, претседател на победничката партија на изборите од 9 февруари, ВВ, изјави дека има намера на конститутивната седница да се изгласа и Владата што тој ќе ја води.
Но, до понеделник, ВВ на Курти немаше обезбедено поддршка од 61 пратеник – минимумот потребен за избор на претседател на Собранието и Владата.
Во моментов, ВВ има 56 потврдени гласа – 48 од сопствените пратеници и осум од не-српските заедници.
Лидерот на Социјалдемократската Иницијатива, Фатмир Љимај, негираше дека има договор со ВВ за избор на претседател на Собранието или за формирање влада.
Партијата на Љимај има обезбедено три пратенички места.
„Иницијативата досега нема договор со никого и е подготвена да работи напорно Косово да ги има своите институции и да не влезе во парламентарна криза, но немаме никаков договор со ниту една политичка групација“, рече Љимај.
Љимај најави дека развојот околу можната соработка ќе се дознае во вторник, изразувајќи подготвеност за соработка со секој што ќе понуди.
Неговите изјави за можен договор со ВВ ги осуди неговиот коалициски партнер, лидерот на ААК, Рамуш Харадинај, нарекувајќи ги срамна поделба.
За разлика од ААК, од ДПК изјавија дека нема да го гласаат ниту претседателот на Собранието.
Пратеникот на ДПК, Мергим Луштаку, рече дека оваа пратеничка група нема да учествува во гласањето додека не се обезбеди „одржливо решение“ за Косово. Тој ги повика другите партии да ги одржат своите ветувања и да не овозможат формирање на владата „Курти 3“.
„Секако, одржливо решение за Косово е изборот на Бедри Хамза како премиер. Веруваме дека со него ќе се воспостави стабилност во земјата. Ги повикуваме политичките партии индивидуално, јавно и на состаноци да останат доследни на ветувањата за да не се дозволи влада ‘Курти 3’“, рече Луштаку.
Во меѓувреме, поддршка за кандидатот на ВВ за претседател на Собранието и за формирањето на Владата ветија дел од не-српските заедници.
Во Собранието ќе има 48 пратеници од ВВ, 24 од ДПК, 20 од ДЛК, 8 од коалицијата ААК-Иницијатива и 20 од заедниците.