Домот на поранешниот вицепремиер и заменик-претседател на СДСМ, Фатмир Битиќи, бил ограбен за време на велигденскиот викенд додека тој се наоѓал надвор од земјата, соопшти Министерството за внатрешни работи на Северна Македонија.
Според МВР, случајот бил пријавен на 21 април во 11:40 часот. Според пријавата, кражбата се случила меѓу 18 април во 07:30 и 21 април во 03:00 часот, кога три лица упаднале во неговиот дом во скопската населба Бутел, користејќи сила и специјални алатки.
„Во 03:00 часот по полноќ, тројца напаѓачи се појавија пред куќата. Двајца влегоа внатре, додека третиот остана надвор како стражар. Целиот чин траеше три до четири минути. Ја зедоа металната сеф каса вградена во ѕидот. Во неа имаше пари и накит со голема емотивна вредност за нашето семејство,“ изјави Битиќи за телевизијата TV24.
Системот за аларм и безбедносните камери го снимиле настанот. Според Битиќи, по околу шест минути реагирала приватната агенција за обезбедување со која е поврзан алармот.
Украдениот накит не е евидентиран во анкетниот лист што Битиќи го поднел до Државната комисија за спречување на корупција.
Во 2020 година, како вицепремиер за економски прашања, Битиќи пријавил куќа од 343 квадратни метри со проценета вредност од 17,2 милиони денари. Тој поседува возило Volkswagen T-Roc, додека неговата сопруга управува со Mercedes E-Class, вредни околу 20.000, односно 30.000 евра.
Битиќи има пријавено три кредити – два во износи од 1,5 и 3 милиони денари со рок на отплата до 2040 година, како и станбен кредит од речиси два милиони денари подигнат во 2023 година.