Демократската унија за интеграција (ДУИ) и нејзиниот лидер Али Ахмети се соочуваат со политички крај, откако, според ВЛЕН, „ги уништиле столбовите на албанската верба преку корупција, заробување на државата и тргување со моќ“.
Во партиско соопштение, ВЛЕН го обвини Ахмети дека „по секоја цена се обидува да се спаси“, користејќи поединци кои, како што наведуваат, „се откажале од патот на промените“.
„Ова е само најновото поглавје од една политичка пракса која веќе две децении ги држи Албанците како заложници преку празни ветувања, додека во сенка делуваат црни листи, досиеја, уцени и тајни служби“, се вели во соопштението.
Според ВЛЕН, „моќта на Ахмети се темели на страв, закани и манипулации“, но сега, велат од таму, „таа се урива под сопствената тежина“.
Во изјавата се наведува и дека Арбен Таравари е дел од стратегија за „димна завеса“ со цел, како што се тврди, да се одвлече вниманието од „падот на ДУИ“ и одговорноста на нејзиниот лидер.
„Таравари избра да биде дел од овој план, но не е централна фигура ниту носител на одлуки – тој е само алатка фрлена на масата на очајната политика“, наведува ВЛЕН.
Партијата вели дека граѓаните веќе не се залажуваат и дека „знаат кој го злоупотребил патриотизмот како штит за корупција“. ВЛЕН порачува дека ќе гарантира доаѓање на денот на одговорност.
„Промената е во тек и нема враќање назад. Старите сценарија и тајните договори нема да ја сопрат волјата на граѓаните за достоинство, правда и чесно претставување“, се додава во соопштението.
ВЛЕН ги повика активистите, симпатизерите и разочараните гласачи на Алијансата за Албанците да им се приклучат во, како што велат, „битка за народот, а не за позиции“.
„Времето на Али Ахмети заврши. Промените се посилни од кога било“, завршува соопштението.