Претседателката на Северна Македонија, Гордана Сиљановска-Давкова, ја отвори вратата за т.н. „креативна дипломатија“ во обидот да се деблокира македонскиот евроинтеграциски процес, потенцирајќи дека Австрија е подготвена да биде домаќин на нова рунда разговори со Бугарија за надминување на политичкиот застој околу уставните измени, пренесува Инбокс7.
Во интервју за Радио Слободна Европа, Давкова рече дека министерката за надворешни работи на Австрија, Беате Мајнл-Рајзингер, предложила Виена да биде локацијата каде би се разговарало за изнаоѓање решение за спорот со Бугарија, кој ја блокира македонската евроагенда.
„Австрија смета дека во овој момент проширувањето на ЕУ е приоритет. Таа е подготвена да разговараме за креативно решение со Бугарија“, рече Давкова, истакнувајќи дека ваквиот пристап би можел да го деблокира процесот без директно нарушување на усвоената преговарачка рамка со ЕУ.
Сиљановска-Давкова, со јасен акцент на правната рамка и политичката реалност, предлага дипломатски маневри во Виена како нова платформа за деблокада на европскиот пат. Иако е скептична за брзи уставни измени, таа ја гледа Австрија како потенцијален посредник кој би можел да ја врати довербата меѓу Скопје и Софија и да овозможи нов импулс во интегративниот процес.
Нема ветување за уставни измени
Ставот на претседателката е дека уставните измени, кои подразбираат вклучување на бугарското малцинство во Преамбулата, не можат да бидат услов без правна и политичка основа. Таа нагласи дека не може да гарантира нивно усвојување, бидејќи одлуката е во рацете на пратениците.
„Јас не сум апсолутен монарх. Пратениците гласаат по сопствено уверување. Уставните измени не се дел од договорот за добрососедство со Бугарија, туку произлегоа од протоколите“, изјави таа.
„ЕУ мора да покаже флексибилност“
Давкова предложи Европскиот парламент или Советот на ЕУ да донесат политички акти со кои би се препорачала флексибилна интерпретација на спорните точки. Таа го спореди процесот со историските модели на германско-француско и полско-германско помирување.
„Не е теорија, туку реална можност според уставните акти на ЕУ. Енергичноста за надминување на проблемот треба да дојде од двете страни“, изјави таа, додавајќи дека е можно да се потпише нов, трет протокол со Бугарија кој нема да биде основа за вето.
Британскиот договор – не е замена за ЕУ
Во однос на Договорот за стратешко партнерство со Обединетото Кралство, Давкова беше децидна дека тој не може да се гледа како алтернатива за ЕУ-членство. Таа додаде дека договорот, тежок 6 милијарди евра, е пред сè насочен кон инфраструктура и инвестиции, и спаѓа под надлежност на владата.
„Не сме во потрага по ‘план Б’. Велика Британија ги води разговорите со нас во рамки на нашата недовршена евроинтеграција“, рече Давкова.
Консултации со владата и односите со опозицијата
На прашањето за односите со премиерот Христијан Мицкоски, таа нагласи дека постои редовна координација по прашања од надворешната политика. Одбележа дека ставила вето на еден закон во изминатата година, но дека често доставува сугестии до институциите.
Во однос на реакциите од опозициската партија ДУИ, кои ја обвинуваат за занемарување на механизмите за етничка застапеност, таа вели дека работи строго според Уставот и законите и внимателно ги составува телата под нејзина надлежност со почитување на принципот на правична застапеност.