Валентин Манасиевски од ВМРО-ДПМНЕ денеска, на прес-конференција, остро го критикуваше однесувањето на Арбен Таравари и најновите случувања во Владата, по одлуката на едното крило од Алијанса за Албанците да го напушти владиното мнозинство.
Манасиевски изјави дека Таравари не покажал интерес за клучни државни прашања, туку фокусот му бил насочен кон, како што рече, „лични и бизнис интереси поврзани со Зоран Заев и Артан Груби“.
„Вечерва ќе се одржи редовна седница на Извршниот комитет на која ќе се разговара и за ова прашање,“ рече Манасиевски, отфрлајќи шпекулации за какви било договори околу поделба на министерства или ресори, особено во контекст на Министерството за здравство.
Тој додаде дека според информации од членови на Владата, Таравари навистина присуствувал на повеќе состаноци, но на истите, никогаш не се заложил за прашања како Законот за јазици, унапредување на балансерот, ниту пак за европската интеграција, која, според Манасиевски, е блокирана поради спорот со Бугарија.
„Она за што вистински се интересирал е концесионерот на паркинзите на Клиничкиот центар – Ѓока – од кој, очигледно, бил исфрлен од игра. Се интересирал и за господата Груби и Заев, и за нивните бизниси поврзани со ДУИ,“ изјави Манасиевски.
Тој заклучи дека е „неспоиво некој да биде дел од Владата, а да седи во прегратките на криминалот на СДС и ДУИ“, повикувајќи на отчетност и интегритет во институциите.