Лидерот на Демократската унија за интеграција (ДУИ), Али Ахмети, во порака до премиерот на Албанија, Еди Рама, го повика да продолжи по патот на помирување и интеграција, оценувајќи дека „со вековна омраза не се живее“.
Во објава на социјалните мрежи, Ахмети ја поздрави победата на Социјалистичката партија на парламентарните избори во Албанија, нарекувајќи ја „спектакуларна и плебисцитарна“.
„Не можеше да има подобро место за прогласување на европската победа на Албанија, од плоштадот на нашиот национален херој, Скендербег“, напиша Ахмети.
Ахмети изрази задоволство што, како што рече, токму Рама ја има одговорноста да ја води Албанија кон Европската Унија.
„Те охрабрувам, Еди, да продолжиш по патот на помирување и интеграција. Регионов има потреба од мир, а не од историски конфликти. Секогаш сум бил покрај тебе, било за официјализирањето на албанскиот јазик, било за иницијативите како Коридорот 8 и заедничката азбука“, наведе тој.
Ахмети предупреди дека постигнатите резултати во регионот се „сериозно загрозени“ и повика на заедничка работа за нивна заштита.
„Имаме уште многу работа пред нас. Времето покажува дека мораме да ги браниме постигнатите успеси. Ќе се спротивставиме на секој обид за враќање назад“, додаде тој.
Пораката Ахмети ја заврши со лична нота, изразувајќи желба за скорешна средба со Рама: „Те прегрнувам како брат, ти посакувам здравје и успех и со нетрпение очекувам да ја продолжиме нашата заедничка европска патека.“
.