Евровизија 2026 започнува во Виена во атмосфера на политички тензии и поделби, откако неколку европски држави решија да го бојкотираат натпреварот поради учеството на Израел.
Според британскиот весник „Гардијан“, годинашното издание, кое се совпаѓа со 70-годишнината од најголемиот музички телевизиски настан во Европа, е проследено со најголемата криза во историјата на натпреварот.
Шпанија, Холандија, Ирска, Словенија и Исланд се меѓу земјите што најавија бојкот или ограничено учество, додека јавните сервиси во дел од државите нема да го емитуваат финалето.
Шпанската телевизија RTVE наместо Евровизија ќе прикажува сопствен музички спектакл, Ирска ќе емитува анимиран филм, а словенечката телевизија ќе прикажува програми посветени на Палестина.
Причина за кризата е незадоволството од одлуката на Европската радиодифузна унија (ЕБУ) да му дозволи на Израел да учествува и покрај војната во Газа.
Критичарите ја обвинуваат ЕБУ за двојни стандарди, потсетувајќи дека Русија беше исфрлена од Евровизија по инвазијата врз Украина во 2022 година.
„Евровизија треба да биде радосна. Но годинава атмосферата е тажна“, изјави историчарот на натпреварот Пол Џордан за „Гардијан“.
Во Виена се најавени и повеќе протести. Австриската полиција очекува околу 3.000 демонстранти на марш за поддршка на Палестина, како и контрапротест во поддршка на учеството на Израел.
Според анкета на австрискиот весник „Дер Стандард“, мнозинството граѓани сметаат дека организацијата на Евровизија е прескапа за Австрија, а само 26 проценти веруваат дека натпреварот ја обединува Европа.
Израел годинава ќе го претставува 28-годишниот Ноам Бетан со песната „Michelle“, додека фаворити кај обложувалниците се Финска, Грција и Данска.
Британскиот претставник „Look Mum No Computer“ има минимални шанси за победа, со коефициент 80:1.
И покрај кризата, организаторите најавуваат спектакуларно шоу, а Европската радиодифузна унија веќе работи и на првата азиска верзија на Евровизија, која треба да се одржи во Бангкок во ноември годинава.