Универзитетот на Југоисточна Европа (УЈИЕ) во средата ја пречека новата генерација студенти на Ориентациониот ден, кој се одржа паралелно на кампусите во Тетово и Скопје и го означи почетокот на академската 2025/2026 година.
Ректорот на УЈИЕ, проф. д-р Садудин Ибраими, на отворањето истакна дека изборот да се студира на овој универзитет претставува важен чекор кон знаење, личен и професионален развој. Тој додаде дека УЈИЕ е „не само центар на знаење, туку и модел на културен соживот, иновација и посветеност на квалитетот“.
Во име на студентите, претседателот на Студентското собрание, Агрон Мухареми, ги охрабри колегите да бидат активни, да ги искористат сите можности што ги нуди универзитетот и да придонесат кон „динамичен, соработувачки и плоден студентски живот“.
За време на настанот, студентите се запознаа со инфраструктурата на универзитетот, добија идентификациски картички, ги изготвија распоредите и се сретнаа со советниците за студентски прашања и администрацијата. Тие беа информирани и за клучните услуги на универзитетот, вклучувајќи ја студентската служба, ИТ-службата, библиотеката и кариерниот центар.