Генералниот секретар на Советот за регионална соработка (RCC), Амер Капетановиќ, ги повика земјите од Западен Балкан да ја продлабочат соработката и да ја зајакнат довербата во процесот на европска интеграција, на Форумот за поврзување одржан во вторник во Тирана.
Обраќајќи се пред лидери, официјални претставници и експерти од Европа и регионот, Капетановиќ изјави дека анкетите на RCC – Балканскиот барометар и Секјуриметар – покажуваат дека граѓаните се оптимисти за европската иднина, но воедно и нетрпеливи кон динамиката на процесот.
„Нашите граѓани ни кажуваат две работи во исто време: тие се оптимисти за тоа што Европа може да донесе, но во исто време се загрижени дали тоа ќе се случи навреме. Затоа ние се фокусираме на опипливи резултати – намалување на роаминг тарифите, олеснување на трговијата, зајакнување на мобилноста и напредување на дигиталните вештини,“ рече Капетановиќ.
Тој ја нагласи улогата на RCC како мост меѓу земјите членки на ЕУ и аспирантите преку иницијативи како Регионалниот заеднички пазар 2025–2028 и Зелената агенда, подготвувајќи го регионот и за нови предизвици, вклучувајќи ја дигиталната трансформација и вештачката интелигенција.
„Внимателниот оптимизам не е наивност. Тоа значи да се биде реалист за ризиците, но да се одбие парализата. Проширувањето не треба да се памети како замор, туку како обновување на Европа – со Југоисточна Европа во нејзиното јадро,“ додаде тој.
Во рамки на Форумот, Капетановиќ оствари средба со назначената министерка за Европа и надворешни работи на Албанија, Елиса Спиропали, на која разговараа за европската интеграција на земјата, приоритетите на регионалната соработка и важноста од обезбедување видливи придобивки за граѓаните.