Падот на Северна Македонија за шест места на најновиот Индекс за слобода на медиумите на „Репортери без граници“ за 2025 година претставува сериозен показател за негативни трендови во демократското управување и односот кон критичкото мислење, соопшти Демократската унија за интеграција (ДУИ).
„Анализата укажува на сериозни слабости – од политичкиот контекст и законската рамка, до економските притисоци и безбедноста на новинарите“, наведува партијата.
ДУИ оценува дека најзагрижувачки е фактот што извештајот јасно ја посочува појавата на паралелни медиумски системи, директно поврзани со политички и економски центри на моќ, кои влијаат врз уредувачките политики и ја поткопуваат довербата на граѓаните.
„Наместо да обезбеди институционална независност, Владата избра да го продлабочи клиентелизмот преку нови механизми на влијание, вклучувајќи и рекламирање на јавни институции во приватни медиуми – што повторно го отвора прашањето за транспарентноста и еднаквиот третман на медиумскиот сектор“, посочува ДУИ.
Партијата ја потсетува Владата дека односот кон медиумите е директно огледало на зрелоста на една демократија.
„Наместо селективна поддршка и политички приспособени уредувачки пристапи, неопходно е да се поттикнат професионалните стандарди, независноста на јавниот сервис, заштитата на новинарите и институционалната подготвеност за одговор на критичко известување со отчетност, а не со притисоци“, се наведува во соопштението.
ДУИ изрази поддршка за секој процес што води кон транспарентност, медиумски плурализам и професионализација, во согласност со европските стандарди кон кои земјата тежнее.