Mинистерот за надворешни работи на Северна Македонија, Тимчо Муцунски, во петокот ја заврши својата еднодневна работна посета на Украина, каде што во Лавов учествуваше на министерскиот состанок за формирање Специјален трибунал за злосторство на агресија против Украина и на неформалниот состанок на Советот за надворешни работи на ЕУ.
Муцунски, кој беше единствениот министер од Западен Балкан на состанокот, допатува по покана на украинскиот министер за надворешни работи Андриј Сибига и високата претставничка на ЕУ за надворешна политика и безбедност, Каја Калас.
„Ја реафирмиравме принципиелната поддршка на Северна Македонија за суверенитетот и територијалниот интегритет на Украина, како и за воспоставување правна одговорност за актите на агресија“, изјави Муцунски, повикувајќи на итен и безусловен прекин на огнот од страна на Русија и ангажман за постигнување праведен и одржлив мир.
Во рамките на посетата, министрите оддадоа почит на украинските борци погребани на гробиштата Личакив во Лавов.