Европската комесарка за проширување, Марта Кос, во понеделникот изјави дека Албанија напредува со побрзо темпо од кога било досега во спроведувањето на реформите за членство во ЕУ и изрази уверување дека земјата може да стане полноправна членка до 2030 година, пренесува Инбокс7.
„Албанија го препозна новиот замав на процесот на проширување и презеде конкретни и брзи чекори. Само во последниве два месеца се отворија уште две поглавја од преговорите,“ рече Кос за време на извештајот во Комисијата за надворешни работи на Европскиот парламент.
Таа информираше дека досега се отворени 24 преговарачки поглавја со Албанија и го пофали напредокот на земјата кон европската интеграција.
„Имаме реална можност до 2029 година една или повеќе кандидатки да станат полноправни членки,“ изјави комесарката.
Кос потенцираше дека владеењето на правото останува клучен и некомпромисен услов за членство, додавајќи дека кандидатките мора да се интегрираат во заедничкиот безбедносен систем на ЕУ.
На 30 мај, зборувајќи на Конференцијата за Центарот за европски студии во Брисел, Кос се изрази оптимистички во однос на отворањето нови преговарачки поглавја со Албанија во текот на јуни.
„За време на мојот мандат како комесар за проширување ќе имаме нови членки од Западен Балкан. Со премиерот Еди Рама имаме јасен договор: процесот ќе се базира на заслуги. Време е да ја конкретизираме ‘брачната врска’ меѓу Албанија и Европа,“ рече Кос.