Еминентниот архитект и универзитетски професор Мишко Ралев најави дека се разгледува неговата кандидатура за градоначалник на Скопје на претстојните локални избори, како потенцијален кандидат на Социјалдемократскиот сојуз на Македонија (СДСМ). Во интервју за емисијата „Трилинг“, емитувана на Телевизија 24, Ралев детално ги образложи своите ставови за урбанистичките проблеми во главниот град, критиките за проектот „Скопје 2014“, како и предизвиците поврзани со дивоградбите и управувањето на градот.
„Скопје е град со богата историја што се протега повеќе од 2000 години. Тоа е уникатен спој на старото и современото. Можеме да се пофалиме со Стара чаршија која е една од најголемите во регионот. Меѓутоа, проектот „Скопје 2014“ не ја почитува оваа историја. Антиквизацијата, како архитектонски поим, кај нас не постои – тоа е политички конструкт кој ја нарушува автентичноста на градот“, рече Ралев.
Тој го критикуваше урбанистичкиот концепт на „Скопје 2014“, истакнувајќи дека голем број објекти што беа изградени или реставрирани во рамките на овој проект немаат историска основа и дека нивната декоративна вредност е измислена. Особено ја нагласи штетата од урбанистичките интервенции кои, како што рече, го нарушуваат природниот и логичен развој на градот, наведувајќи го примерот со Јавното обвинителство и Археолошкиот музеј кои се поставени на неодговарачи локации, блиску до реката.
Еден од најголемите проблеми кои Ралев ги посочи е огромниот број дивоградби, особено во општината Чаир. „Постојат речиси 150 дивоградби во тој дел од градот. Ова е резултат на незаинтересираност и неможност да се спроведат законите“, објасни тој. Ралев потенцираше дека дивоградбите не можат да се легализираат без соодветна инженерска и урбанистичка анализа, што ретко се случува. Тој истакна дека постои „свесно прогледување низ прсти“ од страна на одговорните институции, што го овозможува ваквото ширење на нелегалните градби.
Професорот го критикуваше и системот на управување со градот, особено големата автономија на општините во рамки на Град Скопје. Според него, општините имаат „недозволиво големи ингеренции“ и носат детални урбанистички планови без доволна координација со градските власти, што дополнително ја отежнува контролата и планирањето.
Ралев се осврна и на критиките упатени кон актуелната градоначалничка Данела Арсовска, која беше обвинувана дека не ги презема потребните мерки во првата година од мандатот. „Не можеме да кажуваме дека некој не е компетентен само затоа што не ги открил сите проблеми веднаш. Криминалните активности важат од моментот кога се откриваат, без оглед на времето на пријавување“, изјави тој.
Во врска со неговата потенцијална кандидатура, Ралев рече дека во моментов се водат разговори, но дека одлуката не зависи само од него. „Тоа е голем предизвик и чест. Ако би бил кандидат, првата задача ќе биде поврзување на сите чинители во управата за заедничка цел – да се подобри градот. Скопје мора да се одржува и да се развива, со планови кои ќе опфаќаат инфраструктура, социјални услуги и култура. Градот не е само физичка структура, туку и социјален и културен простор“, нагласи Ралев.
Неговите изјави повторно ја актуелизираа дебатата за иднината на Скопје, особено во делот на урбанистичкото планирање и управување, кои во изминатите години беа предмет на критики од стручната јавност и граѓанските организации. Кандидатурата на Ралев, доколку се потврди, ќе означи засилен ангажман на СДСМ во подготовката за локалните избори и обид за враќање на контролата и стручноста во развојот на главниот град.