Владата во заминување на Косово изрази „загриженост“ и несогласување со одлуката на Врховниот суд со која се поништува една нејзина административна уредба, оценувајќи ја како „неоснована“ и „произволна“, со образложение дека го ограничува делувањето на министрите кои во меѓувреме се избрани за пратеници.
Судот ја прогласи за незаконска и ја укина административната уредба за користење на фискални електронски уреди, донесена од техничкиот министер за финансии Хекуран Мурати, со образложение дека комбинирање на функциите на министер и пратеник е во спротивност со законските одредби.
„Конкретно, членот 31 од Законот за Владата не содржи никаква забрана што би го попречувала донесувањето на подзаконски акти од страна на техничка влада или технички министри. Ограничувањата се однесуваат само на клучни прашања, како што се меѓународни договори, уставни измени и нови закони, но не и на спроведувачки акти како што е оваа уредба“, соопшти Владата.
Уредбата беше објавена во Службениот весник на 16 април, еден ден по нејзиното потпишување од страна на министерот, кој дотогаш веќе беше верифициран како пратеник од новиот парламентарен состав, по изборите на 9 февруари.
Според Владата на премиерот во заминување Албин Курти, процесот на изработка на уредбата започнал уште на 20 ноември 2024 година, кога Владата сè уште имала полн уставен и законски мандат, што ѝ дава, како што велат, „целосен легитимитет“ и во процедурална и во суштинска смисла.
„Одлуката на Врховниот суд е кревка и од логички и од уставен аспект, бидејќи од една страна ја признава техничката влада, а од друга страна ѝ го одзема правото да врши надлежности кои не се забранети со закон“, наведуваат од Владата.
Во врска со делот од одлуката според кој министер во заминување не смее да донесува подзаконски акти откако е избран за пратеник, Владата се повика на пракса на Уставниот суд, според која ваквиот ангажман е дозволен, особено додека Собранието сè уште не е конституирано.
Меѓутоа, според анализата на Еуген Цаколи од Демократскиот институт на Косово, објавена на Фејсбук, Врховниот суд дал „јасна и конечна“ интерпретација дека министрите кои добиле пратенички мандат не смеат да продолжат со извршни функции по денот на сертификација на изборните резултати од страна на Централната изборна комисија.
„Сите одлуки донесени по 27 март се ништовни и во спротивност со Уставот и принципот на поделба на власта. Врховниот суд потврди дека актуелната влада, технички гледано, нема мандат да донесува извршни одлуки“, изјави Цаколи.
Законот за Владата утврдува дека техничка влада не смее да ги надминува своите ограничени овластувања и експлицитно забранува носење на важни политички одлуки.
Владата во заминување најави дека ќе ги искористи сите правни механизми на располагање за, како што наведе, „да ја врати законитоста и демократските стандарди“.
На одлуките на Врховниот суд може да се поднесе жалба само во случај на евентуално прекршување на Уставот пред највисоката судска инстанца – Уставниот суд.