Обвинителката Ленче Ристоска побара од Владата на Северна Македонија да објасни кои кандидати и по кои критериуми не ги исполниле условите за избор на судија во Европскиот суд за човекови права (ЕСЧП), откако владата одби да ја прифати предложената листа од тројца кандидати.
На списокот, покрај Ристоска, се најдоа и судијката од Апелацискиот суд во Скопје, Габриела Гајдова, и адвокатот Јордан Апостолски. Владата соопшти дека кандидатите „не ги исполнувале предвидените услови“ и најави формирање на нова комисија која ќе продолжи со постапката.
„Советот на Европа има пропишано правила за фазите низ кои поминува постапката за предлагање на судија во Европскиот суд за човекови права. Доколку дојде до нивно прекршување, ќе го известам Советот на Европа“, изјави Ристоска за ТВ 24. Таа додаде дека, во интерес на транспарентноста, Владата треба да прецизира кои услови не биле исполнети и во која постапка тоа било утврдено.
Апелациската судијка Габриела Гајдова исто така изрази изненадување и побара дополнителни појаснувања. „Доколку е вистина дека листата е вратена поради неисполнување на услови, би било во ред да знам кои се тие услови кои наводно не ги исполнувам“, рече таа.
Адвокатот Јордан Апостолски остана недостапен за коментар.
Од Владата повторија дека предложените кандидати не ги исполниле условите, но не дадоа детали ниту за тоа кои критериуми биле спорни, ниту зошто листата првично не била испратена во Стразбур.
Останува нејасно како ќе продолжи процесот, додека актуелниот судија на ЕСЧП од Северна Македонија, Јован Илиевски, го завршува својот мандат на 1 февруари 2026 година.