Словенија го конституираше новиот, десетти парламентарен состав по изборите од 22 март, но почетокот на неговата работа беше обележан со неочекуван политички пресврт и неизвесност околу формирањето влада.
За претседател на парламентот беше избран Зоран Стевановиќ, лидер на малата партија „Ресница“, во потег што аналитичарите го оценуваат како значајна промена во постизборниот баланс на силите.
Изборот беше поддржан од десничарските партии, вклучително и блокот на Јанез Јанша, по неколкудневен застој во преговорите.
Политичките аналитичари оценуваат дека ваквиот исход може да му отвори пат на Јанша за формирање влада, потенцијално и малцинска, додека актуелниот премиер Роберт Голоб се соочува со неуспех во обидите да формира поширока коалиција.
Голоб претходно се обидуваше да формира влада на национално единство без учество на Јанша, нудејќи клучни ресори на потенцијалните партнери, но преговорите пропаднаа поради инсистирањето на десничарските партии за појасно десно ориентирана извршна власт.
Во меѓувреме, Јанша најави протести против корупцијата, потег што дел од аналитичарите го толкуваат како обид за создавање политички притисок и мобилизација на поддржувачите.
Паралелно со политичките преговори, новиот парламентарен состав се соочува и со критики поради најавите за значително зголемување на платите на функционерите.
Според предложените мерки, платите на пратениците би можеле да се движат од околу 5.000 до 10.000 евра месечно, додека министрите би примале меѓу 7.000 и 9.000 евра, а премиерот околу 10.000 евра.
Овие предлози предизвикаа реакции во јавноста, со оглед на тоа што платите во Словенија се повисоки од просекот во регионот, но зголемувањето на примањата на политичарите останува чувствително прашање.
Аналитичарите оценуваат дека исходот од преговорите во наредните денови ќе биде клучен за политичката стабилност на земјата, која се соочува со една од најнеизвесните постизборни ситуации во последните години.