Пратеникот на владејачката ВМРО-ДПМНЕ, Миле Лефков, обвини за координирана хибридна офанзива против него и неговото семејство, откако бугарскиот весник 24 Часа објави дека повеќе членови од неговото семејство во Кочани се бугарски државјани.
Весникот објави дека околу дваесетмина роднини на Лефков, меѓу кои и неговиот брат Иван, се стекнале со бугарско државјанство преку потврда за бугарско потекло. Според медиумот, тие изјавиле дека имаат дедо Бугарин и се чувствуваат како Бугари.
Лефков, кој неодамна тврдеше дека бугарските разузнавачки служби водат операција за дискредитација на премиерот Христијан Мицкоски, остро реагираше на написите, оценувајќи ги како дел од организирана кампања.
„Хибридна офанзива во полн ек! Објави насочени против мене и мојата фамилија – за минута преземени на страници кај нас. Лаги, дискредитации, стартуваат по нарачка од ботови или бугарски извори, а потоа молневито се шират“, напиша Лефков на социјалните мрежи.
Тој ја обвини опозициската СДСМ дека со изјави за „жолти комбиња“ и „параноја“ се обидува да ја минимизира ситуацијата и да го дефокусира вниманието од, како што рече, реалните закани кон македонските политичари што ги штитат националните интереси.
„Ова не е параноја, туку организирана операција. СДСМ да одбере страна – рацете подалеку од фамилијата, рацете подалеку од Македонија“, изјави тој.
Во телевизиско интервју на ТВ Алфа, Лефков оцени дека постои синхронизација меѓу делувањето на СДСМ и наративот на официјална Софија, што според него, упатува на „анти-македонски и пробугарски“ ставови на опозицијата.