Претседателот на САД, Доналд Трамп, му наложил на Пентагонот да подготви можни опции за употреба на воена сила против нарко картели кои се прогласени за терористички организации, потврдија во петокот двајца американски функционери.
Еден од функционерите рече дека евентуалната употреба на воени ресурси не е неизбежна во скоро време. Не е јасно какви конкретни овластувања ќе произлезат од наредбата и какви операции би можеле да бидат разгледани, при што правната основа за таква интервенција би била предмет на дебата.
„Њујорк Тајмс“ прв објави дека Трамп потпишал директива за подготовка на воени опции против картелите. Пентагон одби коментар и упати на Белата куќа, каде портпаролката Ана Кели рече дека „главен приоритет на претседателот Трамп е заштитата на татковината, поради што презеде храбар чекор да прогласи неколку картели и банди за странски терористички организации“.
Одговарајќи на прашање дали ќе испрати американски сили во Латинска Америка за да се справат со картелите, Трамп изјави: „Латинска Америка има многу картели и многу дрога што тече. Мора да ја заштитиме нашата земја. Ќе кажеме повеќе за тоа наскоро.“
Претседателката на Мексико, Клаудија Шеинбаум, во петокот ја отфрли можноста за американска воена интервенција на мексиканска територија. „САД нема да дојдат во Мексико со војска. Соработуваме и координираме, но инвазија нема да има,“ рече таа.
Во февруари, администрацијата на Трамп ги прогласи „Трен де Арага“, Синалоа картелот, МС-13 и други групи за глобални терористички организации. Државниот секретар Марко Рубио изјави дека тоа овозможува користење на разни средства против картелите, вклучително и ресурси на Пентагонот и разузнавачките агенции.
Некои експерти, меѓутоа, предупредуваат дека ваквото прогласување не дава автоматско овластување за употреба на воена сила без дополнителна извршна или конгресна одлука. „Сето ова е правно чувствително прашање“, рече поранешниот советник на Стејт департментот, Брајан Финукен.