Претседателот на Собранието Африм Гаши ќе ги распише локалните избори во сабота, на 9 август. Првиот круг ќе се одржи на 19 октомври, а вториот на 2 ноември во општините каде што нема да бидат избрани градоначалници во првиот круг. Кампањата почнува на 28 септември и ќе трае 20 дена, сè до изборниот молк.
Собранието ќе стави пауза на пленарните и комисиските седници за да се избегне користење на говорницата за изборна пропаганда, но политичките партии веќе се активни на терен. Експертите предупредуваат дека ќе се води жестока кампања налик на онаа за парламентарни избори.
„Гледаме теми кои се повеќе се поврзани со билатерални прашања, како тоа со Бугарија, или со легитимитетот кај Албанците, наместо со локални проблеми како паркинг, пешачки зони или водоснабдување,“ вели за телевизија 24 политичкиот аналитичар Џелал Незири. „Сведоци сме на кампања како за парламентарни, а не за локални избори.“
Најжестоката трка се очекува во Чаир, каде што ќе се соочат двајца поранешни високи функционери на ДУИ — Бујар Османи и Изет Меџити. „Таму најверојатно ќе заврши нечија политичка кариера,“ вели Незири. „Ако Меџити загуби, тоа ќе биде удар за коалицијата Влен. Ако Османи загуби, тоа може да предизвика потреси во ДУИ.“
Во Скопје, во трката за градоначалник официјално влегуваат актуелниот градоначалник на Кисела Вода Орце Ѓорѓиевски од ВМРО-ДПМНЕ, поранешната министерка Каја Шукова од СДСМ, Скендер Реџепи од Европскиот фронт и Башким Бакиу од Вреди. Левица најави дека ќе има свој кандидат, но засега не го открива името.
Државната изборна комисија ќе ги утврди роковите за изборните дејствија на денот на распишувањето на изборите. Кандидатските листи за градоначалници и советници треба да се поднесат најдоцна 35 дена пред изборите. Ќе се гласа во 80 општини и во градот Скопје. Еден ден пред изборите, на 18 октомври, ќе гласаат болните, немоќните и затворениците. Дијаспората нема да гласа.