Заменичката генерална секретарка на НАТО, Радмила Шекеринска, престојуваше во дводневна посета на Сараево каде што оствари средби со високи претставници на Босна и Херцеговина и учествуваше на Безбедносната конференција во Сараево.
Шекеринска се сретна со членови на Претседателството на БиХ, при што го потврди „цврстото заложување“ на Алијансата за суверенитетот, територијалниот интегритет и уставниот поредок на земјата. Таа нагласи дека НАТО ќе продолжи да ја поддржува ЕУ-операцијата Алтеа, предупредувајќи дека „безбедносен вакуум во БиХ нема да биде дозволен“.
Во рамките на посетата, Шекеринска се сретна и со членовите на Заедничката комисија за одбрана и безбедност и со делегацијата на БиХ во Парламентарното собрание на НАТО. Таа одржа и билатерални разговори со командантот на ЕУФОР, генерал-мајор Флорин-Мариан Барбу, високиот претставник за БиХ Кристијан Шмит и заменик-министерот за надворешни работи Јосип Брик.
Шекеринска посети и група студенти кои учествуваа во симулација на Северноатлантскиот совет, организирана од НАТО Алијансната команда за трансформација, пред нејзиното обраќање на отворањето на Безбедносната конференција во Сараево.
„Безбедноста и стабилноста на Босна и Херцеговина се од суштинско значење за целиот регион, за Европа и, секако, за НАТО,“ изјави таа. „Иако војната ја одбележа минатото на оваа земја и на регионот, таа не ја дефинира сегашноста и не смее да ја одреди иднината,“ додаде Шекеринска, нагласувајќи дека БиХ заслужува „иднина на мир, просперитет и економски раст“.