Околу 245.000 ученици во Северна Македонија денеска ја започнаа новата учебна 2025/2026 година, од кои 177.800 се основци, а 67.200 средношколци, соопшти Министерството за образование. Наставата ќе трае до 10 јуни, со исклучок на матурантите кај кои часовите завршуваат порано.
Министерката за образование Весна Јаневска изјави дека оваа година сите ученици ќе имаат учебници по сите предмети. „Учебниците се доставени во 90 проценти од училиштата, а преостанатите ќе пристигнат следната недела,“ рече таа.
Премиерот Христијан Мицкоски и министерката Јаневска денеска присуствуваа на почетокот на наставата во основното училиште „Кирил Пејчиновиќ“ во скопската општина Кисела Вода.
Новата учебна година ќе донесе и неколку промени: седмоодделенците ќе имаат задолжителна општествено-корисна работа, а средношколците ќе следат програми по нови наставни концепти. Министерството најави и воведување на дигитализација и алатки со вештачка интелигенција во наставата.
Податоците покажуваат дека бројот на ученици продолжува да опаѓа, бележејќи децениски пад. Во учебната 2024/25 на почетокот на годината биле запишани 180.627 основци и 67.143 средношколци, што претставува пад од околу 6 % и 19,6 % соодветно во споредба со 2014/15 година.
Трендот на опаѓање е забележан речиси секоја година, со исклучок на учебните 2016/17 и 2020/21 кога е регистриран благ раст. Во споредба со претходната година, бројот на основци е намален за 0,8 %, а на средношколци за 0,2 %. Намалувањето на учениците е одраз на демографскиот пад, миграцијата на млади семејства и наталитетот кој постојано опаѓа
.