Премиерот Христијан Мицкоски рече дека пожарите во околината на Скопје се под контрола, откако институциите брзо реагирале, додека истовремено ги обвини „центрите на моќ“ за обиди да ја поткопаат стабилноста на државата.
„Има индиции кој можел да биде инспиратор за пожарите“, рече Мицкоски во интервју за ТВ Алсат. „Институциите координирано реагираа и денеска ситуацијата во Дрисла, Вардариште и Трубарево е нормализирана. Граѓаните треба да бидат мирни, а одговорност ќе има за сите кои се однесувале девијантно“.
Мицкоски рече дека околу дваесетина лица се под мониторинг поради сомнежи за вмешаност во подметнување на пожари и дека повеќе од 30 лица се веќе приведени. Тој додаде дека најголемиот дел од пожарите се предизвикани од човечки фактор.
Премиерот ги обвини функционерите на ДУИ, за кои постојат над 20 кривични пријави, но кои се уште се на слобода поради одлуки на судот и обвинителството. „Мораме да го споменеме ДУИ за наследството од 22 години власт и криминалите поврзани со високите функционери“, рече Мицкоски.
Тој исто така истакна дека минатата влада ја ослабила институционалната рамка, но дека сегашната администрација направила значителни напори за подобрување на системот. „Не можеме да го поправиме сето уништување од претходните седум години за 15 месеци, но направивме многу, и уште повеќе останува да се направи“, рече Мицкоски.