Македонската ИТ индустрија, во која работат од 25.000 до 30.000 професионалци, годинава бележи бран отпуштања и „замрзнување“ на нови вработувања, велат претставници на секторот, јави Радио Слободна Европа. Бројот на огласи за работа се намалил, иако во 2024 година приходите на индустријата пораснале за 10%.
Намалувањето на вработувањата следи по глобалниот тренд во кој стотици илјади луѓе останаа без работа во технолошките гиганти. Сепак, ИТ останува меѓу најатрактивните области за студирање во Северна Македонија, каде само на ФИНКИ и ФЕИТ секоја година се пополнуваат 1.600 места за нови студенти.
„Кога почнав да работам како програмер во 2004, платата не ми беше доволна ни за кирија. Денес, технологијата целосно ја промени индустријата“, вели програмерот Андон Ц. за Радио Слободна Европа, додавајќи дека најголемиот раст бил за време на пандемијата на ковид-19.
Иако бројот на компании расте, формирањето квалитетни тимови станува сѐ потешко, велат претставници на индустријата. „ИТ секторот не е во пад, туку во адаптација и стабилизација“, изјави Дамјан Дано, основач на порталот IT.mk, додавајќи дека индустријата бележи 3% раст на вработени во 2024.
Правниот советник Јован Најденовски предупреди дека формалното образование не ги следи доволно брзо технолошките промени, а недостигот на кадри е особено видлив во областа на вештачката интелигенција, компјутерска безбедност и зелени технологии.
Дел од квалитетниот кадар заминува во странство, што според експертите претставува еден од најголемите ризици за локалниот пазар. „Кога заминуваат луѓе кои во Македонија живеат во финансиска благосостојба, тоа е сериозен проблем“, рече Најденовски.
И покрај предизвиците, студентите остануваат оптимисти. „Ако почнеш порано да го одиш патот, полесно е подоцна да напредуваш“, вели Синиша С., студент на ФИНКИ, кој се надева дека ќе влезе во индустријата и покрај конкуренцијата и турбуленциите.