Изборната кампања за локалните избори меѓу албанските партии повеќе наликува на натпревар меѓу партиските лидери за парламентарни избори отколку на натпревар за локална власт, оценува политичкиот аналитичар Џелал Незири, пренесе ТВ Телма.
„Граѓаните се соочуваат со основни проблеми за животот кои бараат одговор токму од оние што сега кандидираат за градоначалници и советници. Наместо тоа, целата кампања се фокусираше на поголеми политички каузи, далеку од секојдневните грижи на луѓето,“ изјави Незири.
Во завршницата на кампањата, политичките партии ја интензивираа реториката. „На 19 октомври Албанците ќе зборуваат јасно – самите ќе ги изберат своите политички претставници, а не оние назначени од Мицкоски и неговата оска. Тоа ќе биде момент на обединување и потврда на достоинството, еднаквоста и европскиот правец,“ изјави Арбер Адеми од Националната алијанса за интеграција.
Дритон Сулејмани од коалицијата „Вреди“ додаде дека нивниот „храбар и реалистичен план“ има цел да ги трансформира општините во примери за развој и транспарентност. „Бројот 7 на гласачкото ливче е симбол на единство и континуитет,“ рече тој.
Незири предупредува дека ваквата реторика нема да предизвика голема излезност. „Граѓаните веќе ја препознаа намерата – зад големите политички пораки се сокриваат реалните проблеми. Затоа не очекувам мобилизација,“ изјави тој за Телма.
Според него, овие избори може да донесат рекордно ниска излезност – што, како што вели, „не е добар показател за квалитетот на демократијата во земјата.“