Министерството за внатрешни работи ќе користи дронови и мобилни полициски тимови за надзор на избирачките места на локалните избори во недела, во рамките на мерките за безбедно и непречено спроведување на изборниот процес.
„Безбедноста на граѓаните ќе биде гарантирана со стандардни технички средства, мобилни тимови и пунктови, а ќе се користи и современа технологија – дронови за воздушна контрола со цел побрза реакција и навремено преземање мерки во случај на инциденти,“ соопшти МВР.
Полициски сили ќе бидат распоредени во близина на избирачките места и на клучните сообраќајни точки за да се обезбеди јавниот ред и мир. Министерството апелираше до граѓаните и политичките партии да придонесат за мирна и демократска атмосфера и да ги почитуваат упатствата на полициските службеници.
Денеска е последниот ден од изборната кампања, а на полноќ започнува изборниот молк, кој ќе трае до затворањето на гласачките места во недела. Според Изборниот законик, секое медиумско известување или изјава што може да влијае врз одлуката на избирачите се смета за прекршување на молкот.
ДИК информираше дека за изборите се отпечатени и дистрибуирани 4.613.438 гласачки ливчиња, со двојна видлива и невидлива заштита. Најдолгото ливче, печатено за неколку општини, е половина метар.
Право на глас имаат 1.832.415 избирачи, вклучувајќи 112.000 лица на привремена работа во странство, 2.162 во притвор или на издржување казна, и 450 жители на домови за стари лица. Во земјата се регистрирани 3.480 избирачки места, од кои 3.474 ќе бидат отворени на денот на изборите.
Кампањата за вториот круг ќе започне на 20 октомври, во општините каде градоначалник нема да биде избран во првиот круг.