Украинскиот претседател Володимир Зеленски изјави дека разговорите со американскиот претседател Доналд Трамп за можноста Украина да добие долгодострелни ракети „Томахок“ остануваат „отворени“, иако засега нема конкретен напредок.
Во Вашингтон, двајцата лидери разговарале за американската воена помош, потенцијален прекин на огнот со Русија и безбедносни гаранции за Украина. Зеленски му честитал на Трамп за посредувањето во прекинот на огнот во Газа, додавајќи дека „војната може да заврши со вашата помош“.
Трамп предупредил дека испраќањето на ракети „Томахок“ би можело да доведе до „поголема ескалација“ и додал дека „многу лоши работи може да се случат“. Претходно во неделата, Трамп навести дека би можел да ја разгледа можноста за испорака на ракетите, но по телефонски разговор со рускиот претседател Владимир Путин изјави: „И нам ни се потребни… не знам што можеме да направиме околу тоа“.
Трамп и Путин се договориле да се сретнат во Будимпешта следната недела, а нивните советници ќе започнат подготовителни разговори.
По средбата, Зеленски изјави дека „дискусиите биле продуктивни“, но ги опиша темите за територијалните отстапки како „осетливи и тешки“. Тој рече дека Русија сака да ги задржи сите освоени територии во случај на прекин на огнот – нешто што Украина не го прифаќа.
Зеленски побара силни безбедносни гаранции од САД, нагласувајќи дека „украинскиот народ се плаши дека, ако има прекин на огнот, Путин повторно ќе нападне без американска поддршка“.
Неколку европски земји веќе понудија свои сили за поддршка на евентуален прекин на огнот, но Киев стравува дека без учество на САД, тие гаранции нема да бидат доволни.
Во обраќање пред новинарите пред Белата куќа, Зеленски рече дека Украина се соочува со „многу тешка ситуација“ поради руските напади со балистички ракети и дека земјата има потреба од нов пакет оружје „за да ја зголеми притисокот врз Русија“.
Зеленски додаде дека Русија се „плаши“ од можноста Украина да добие „Томахок“ ракети, бидејќи тие се „силно оружје“ кое може да ја промени рамнотежата на војната.
Иако изјави дека е „реалист“, Зеленски нагласи дека верува во желбата на Трамп да помогне во постигнување мир. „Веруваме дека тој сака да ја заврши оваа војна. Тоа е тешка, но можно решение“, рече тој.
Според извори од Белата куќа, средбата меѓу двата претседатели поминала во многу помирна атмосфера отколку нивниот претходен, напнат состанок во февруари.