Последниот нацрт-план на американскиот претседател Доналд Трамп за завршување на војната во Украина предвидува Киев да отстапи дел од својата територија на Русија, Москва да биде вратена во Г8 и Украина да биде трајно блокирана од членство во НАТО, пренесе „Гардијан“.
Украинскиот претседател Володимир Зеленски изјави дека очекува да разговара со Трамп „во наредните денови“, истакнувајќи дека секој договор мора да донесе „достоинствен мир“ и да го зачува „суверенитетот и независноста“ на Украина.
Претседателската администрација во Киев реагираше внимателно, но дел од украинските официјални лица го оценија планот како „апсурден“, „капитулантски“ и како ефективен крај на Украина како независна држава, пишува „Гардијан“.
Според нацртот, кој наводно го изготвиле руски и американски претставници, меѓу кои и шефот на Рускиот фонд за директни инвестиции Кирил Дмитриев, Украина би се откажала од Донбас, а Крим, Луганск и Донецк би биле признаени како де факто руски, вклучително и од САД.
Планот предвидува делови од Донецк од кои Украина се повлекла да станат демилитаризирана зона во која руските сили нема да влезат, додека линиите на фронтот во Херсон и Запорожје би биле „замрзнати“. Атомската централа Запорожје би била ставена под супервизија на Меѓународната агенција за атомска енергија, а произведената електрична енергија би се делела меѓу Русија и Украина.
Според документот, Украина би ја намалила својата армија на 600.000 луѓе. НАТО би се согласил да не стационира трупи на украинска територија и земјата би била блокирана од членство во Алијансата, иако Киев долго време инсистира дека евроатлантските гаранции се клучни за нејзината безбедност.
Планот, кој САД го поддржуваат според изјавите на портпаролката на Белата куќа Каролин Левит, предвидува Русија повторно да биде интегрирана во глобалната економија и вратена во Г8 по речиси четири години санкции. Притоа, 100 милијарди долари замрзнати руски средства би биле насочени кон обновата на Украина, а дел од средствата би биле вложени во заеднички американско-руски фонд.
Според документот, Украина би одржала избори во рок од 100 дена, а двете држави би вовеле образовни програми за промовирање меѓукултурно разбирање.
Санкциите би се повторно активирале доколку Русија повторно нападне, наведуваат западните медиуми.