Амбасадата на Кина во Скопје остро реагираше на средбата меѓу потпретседателот на Собранието, Антонијо Милошоски, и делегација од тајванското претставништво во Рим, оценувајќи дека потегот ја поткопува политичката основа на билатералните односи.
Во отворено писмо упатено до Милошоски, амбасадата соопшти дека средбата „го крши принципот ‘Една Кина’ и испраќа погрешен сигнал до сепаратистичките сили кои се залагаат за независност на Тајван“. Кинеската страна наведе дека Тајван е „неотуѓив дел од кинеската територија“ и дека „никогаш не бил држава“.
Собранието на 20 ноември објави фотографии од средбата, на која покрај Милошоски присуствуваа и пратениците Фатмир Битиќи и Рашела Мизрахи. Објавата подоцна стана недостапна на официјалната веб-страница.
Битиќи, пратеник од СДСМ, во своја изјава потврди дека средбата имала работен карактер.
„Заедно со колегата Антонијо Милошоски и колешката Рашела Мизрахи во Собранието имавме работна средба со делегација на Тајван предводена од шефот на канцеларијата на Тајванското претставништво во Рим, Винсент Цаи. Разговаравме за можностите за унапредување на парламентарната и економска соработка меѓу двете земји, со акцент на размена на искуства и поттикнување заеднички инвестиции“, напиша тој. Битиќи додаде дека била изразена и поддршка за донацијата што Тајванската делегација ја додели на Универзитетската клиника за детски болести.
Амбасадата потсети дека Северна Македонија во 1993 година ја признала Владата на Народна Република Кина како единствена легитимна влада на Кина, а обврските биле повторно потврдени во 2001 година. „Билатералните и меѓународните политички обврски мора искрено и целосно да се почитуваат“, се наведува во реакцијата.
Кинеската страна предупреди дека вакви потези може да имаат последици врз економската и политичката соработка. „Дали напуштањето на огромен пазар е во интерес на македонскиот народ?“, праша амбасадата.
Милошоски за „360 степени“ изјави дека средбата била „куртоазна, без дипломатски предзнак“ и дека не претставува обид за менување на официјалната политика на Македонија кон Кина. Тој додаде дека станува збор за „благодарност за поддршката“ што Тајван ја дал на Универзитетската клиника за детски болести.
Тој истакна дека политиката на Македонија кон Кина останува непроменета, со почитување на суверенитетот и територијалниот интегритет на Народна Република Кина. „Различни мислења и ставови се нормална појава во демократско општество“, рече Милошоски.
Кинеската амбасада претходно во 2024 година се обиде да ги одврати Милошоски и Битиќи од учество на самитот на Интерпарламентарната алијанса за Кина во Тајпеј, но двајцата пратеници сепак отпатуваа.
Средбата меѓу претседателот на Собранието, Африм Гаши, и амбасадорката на Кина, Џианг Сиаојан, одржана денеска, дојде само ден по средбата со тајванската делегација. Амбасадата не го поврза директно состанокот со актуелниот дипломатски спор.