Премиерот Христијан Мицкоски во четвртокот изјави дека владината реформска агенда, одобрена од Европската комисија, ќе се насочи кон добро владеење, чиста енергија, образование, развој на бизнисот и владеење на правото, оценувајќи дека Планот за раст на ЕУ претставува „приказна за претворање на заложбата во вистинска промена“.
Говорејќи на Самитот „Нашиот пат кон ЕУ“ во Тирана, Мицкоски рече дека Северна Македонија е прва земја од регионот што го операционализирала Инструментот за реформи и раст и прва што добила пред-финансирање во рамките на Планот.
„Ова е резултат на посветена работа и доверба во европските вредности,“ рече тој.
Премиерот соопшти дека државата досега примила околу 24 милиони евра – комбинација од заеми и грантови – по двете поднесени барања за исплата, со кои се поддржани реформи во дигиталните услуги, деловната клима и енергетската ефикасност.
„Продолжуваме со натамошни реформски чекори. Завршувањето на овие процеси ќе отклучи дополнителни над 134 милиони евра поддршка од ЕУ. Но ова не се само бројки – ова се приказни за промена,“ рече Мицкоски.
Тој наведе примери за интеграција и поврзување, меѓу кои приклучување на Македонија кон европската платежна зона СЕПА, спроведување на проектот WiFi4WB во 63 општини, како и изградба на национална антена на Фабриката за вештачка интелигенција за поврзување со европскиот ВИ-екосистем.
Мицкоски најави и модернизација на трите гранични премини – Деве Баир, Блаце и Богородица – во рамки на иницијативата Зелен коридор.
Според него, преку Планот за раст во тек се проекти вредни околу 1,1 милијарда евра, од кои повеќе од половина милијарда се грантови на ЕУ насочени кон енергетска ефикасност, транспорт и железничка инфраструктура.
Тој порача дека реформите не се спроведуваат „затоа што некој тоа го очекува, туку затоа што веруваме во европската идеја“, повикувајќи на „правичен, меритократски пристап“ што ќе ги наградува резултатите.
Мицкоски ги охрабри европските партнери заеднички „да го претворат Планот за раст во реален напредок денес, а не утре“.