Европската комесарка за конкуренција Тереса Рибера во средата ја обвини американската администрација на претседателот Доналд Трамп дека врши „уцена“ врз Европската унија, по изјави од Вашингтон кои ги поврзаа царините на челик и алуминиум со промените во европските дигитални правила.
Американскиот секретар за трговија Хауард Латник во понеделникот во Брисел рече дека САД би можеле да го променат пристапот кон металните тарифи доколку ЕУ ги преиспита своите дигитални прописи. Европските претставници ги протолкуваа коментарите како притисок врз Законот за дигитални пазари (DMA) и други актi на ЕУ за големите технолошки компании.
„Тоа е уцена,“ изјави шпанската комесарка Рибера за Политико. „Тоа што ова е нивна намера не значи дека ќе прифатиме ваков вид уцена.“
Рибера, која е извршна потпретседателка на Комисијата, рече дека дигиталната регулатива на ЕУ не смее да биде дел од трговските преговори. Тимот на Трамп бара ревизија на рамковниот трговски договор што тој го склучи со претседателката Урсула фон дер Лајен во јули.
Вашингтон смета дека DMA е дискриминаторски, бидејќи повеќето големи компании што се опфатени – меѓу кои Мајкрософт, Гугл и Амазон – се американски. САД, исто така, се спротивставуваат на Законот за дигитални услуги, тврдејќи дека ограничува содржини на мрежи како Х.
„Ги почитуваме нивните правила за нивниот пазар – дигитален, здравствен, челичен, автомобилски – тоа е нивна работа и нивен суверенитет. Истото важи и за нас,“ рече Рибера.
Таа и еврокомесарката за технолошка политика Хена Виркунен го надгледуваат DMA, кој има за цел да обезбеди фер конкуренција на европскиот дигитален пазар.
Рибера остро реагираше на изјавите на Латник по неговите средби со европски министри, повторувајќи дека „европската дигитална регулатива не е предмет на преговори“.
И покрај тврдата позиција на Комисијата, меѓу земјите на ЕУ почнуваат да се појавуваат разлики. Латник рече дека некои министри биле „поотворени“ од Комисијата за можни измени на правилата и дека Европа треба да го преиспита моделот доколку сака американски инвестиции.
Германската министерка Катерина Рајх изјави дека Берлин се залага за „поголема флексибилност“ во дигиталната регулатива, вклучително и во DMA и Законот за дигитални услуги.
Притисокот од Вашингтон доаѓа во момент кога САД глобално настојуваат да ги ослабат дигиталните закони во други држави. Овој месец Јужна Кореја се повлече од планираниот режим за дигитална конкуренција по американски лобирања.
Комисијата паралелно работи на проценка на постојните правила преку иницијативата „Digital Fairness Fitness Check“ и тековната ревизија на DMA. Но, со растечкиот трговски притисок и поделбите во ЕУ, останува прашањето дали DMA ќе ја издржи новата фаза на трансатлантскиот конфликт.