Повеќе од 2.000 летови низ Соединетите Американски Држави беа откажани или одложени во петокот, откако федералните власти наложија намалување на авио-сообраќајот поради владината блокада што трае веќе 38 дена — најдолга во историјата на земјата.
Федералната управа за авијација (FAA) соопшти дека ќе намали бројот на домашни летови за 4% оваа недела, а до 10% до крајот на следната, што би можело да влијае на до 4.000 летови дневно. Ограничувањата ќе опфатат 40 од најпрометните американски аеродроми, меѓу кои JFK во Њујорк, LAX во Лос Анџелес, Денвер и најфреквентниот во светот – Хартсфилд-Џексон во Атланта.
Причина за одлуката е недостигот од контролори на летови, дел од кои не доаѓаат на работа или бараат дополнителни извори на приходи, бидејќи работат без плата за време на блокадата. „Наш приоритет е безбедноста,“ изјави американскиот секретар за транспорт Шон Дафи, додавајќи дека мерките ќе ја намалат „притиснатоста“ во системот.
Некои контролори, како Џек Крис од базата Joint Andrews во Мериленд, велат дека чувствуваат „предавство“ од владата, бидејќи мораат да бараат дополнителна работа за да обезбедат приходи.
Големите авиокомпании, вклучувајќи ги United, Delta, American и Southwest, понудија целосни рефундации или бесплатно пререзервирање за патниците погодени од откажаните летови.
Владината блокада, која започна на 1 октомври, предизвика сериозни нарушувања во јавните служби, суспендирајќи програми за социјална помош и оставајќи илјадници федерални работници без плата. Сенатот, кој се обидува да го прекине ќор-сокакот, разгледува предлог-закон за исплата на „есенцијалните“ работници и војници, но преговорите меѓу републиканците и демократите остануваат во застој.
Американскиот синдикат на контролори на летови предупреди дека состојбата може дополнително да се влоши доколку не се постигне договор за отворање на владата.
„Оваа ситуација ќе стане уште поопасна доколку политичарите продолжат да нè користат како пиони,“ изјави претседателот на синдикатот Ник Даниелс.
Додека повеќето меѓународни летови сè уште не се засегнати, властите предупредуваат дека недостатокот на персонал може да доведе и до меѓународни доцнења доколку кризата продолжи.