Лидерот на ВМРО-ДПМНЕ, Христијан Мицкоски, на отворањето на XVIII конгрес на партијата во Кавадарци рече дека новата платформа „Државност 2030“ претставува модел за современо државно водство, насочен кон стабилни институции, продуктивност и европска интеграција.
Конгресот се одржува во спортскиот комплекс „Јасмин“ под мотото „Визија што гради држава – За генерацијата што доаѓа 2030“.
„Новата политичка епоха бара парадигма што ја надминува логиката на транзицијата. ‘Државност 2030’ се темели врз три оски: институционална стабилност над политички циклуси, продуктивност како национален приоритет и идентитет плус Европа како синтеза, а не конфликт“, изјави Мицкоски.
Тој ги претстави и десетте принципи кои, според него, ја дефинираат новата парадигма на модерното државно водство. Меѓу нив се почитување на достоинството, владеење на правдата, знаењето како капитал, силна но не доминантна држава, заедничка национална судбина, праведна пазарна економија, стабилни институции, Европејство како вредност, технологија и одржливост како извори на развој и општество засновано врз доверба.
„Овој идеолошки кодекс и новиот национален договор го оформуваат политичкиот курс на партијата за периодот 2025–2030“, рече Мицкоски, додавајќи дека целта е Македонија да биде суверена во идентитетот, европска во ориентацијата, стабилна во институциите и успешна во економијата.