Министерот за внатрешни работи Панче Тошковски изјави дека утрово добил автоматска сообраќајна казна додека патувал кон Кавадарци на партиски конгрес, оценувајќи дека случајот покажува како државата треба да функционира – со еднаква примена на законот за сите граѓани.
Тошковски напиша на „Фејсбук“ дека добил СМС-порака од системот „Безбеден град“ кој регистрирал дека се движел 1 км/ч над дозволената брзина.
„Ова е најдобра илустрација за тоа како треба да функционира државата. Системот важи еднакво за сите и кога ќе регистрира прекршок – санкцијата следи, без разлика кој е во возилото. Нема исклучоци, нема селективност, нема привилегирани“, напиша тој.
Тошковски додаде дека управувањето со возило е обврска, а не привилегија, и дека доследната примена на правилата гради доверба и безбедност.
Тој нагласи дека целта на „Безбеден град“ не е казнување, туку ред, дисциплина и спречување човечки жртви, посочувајќи на високата стапка на загинати во сообраќајни несреќи во државата.
„Државата ќе биде побезбедна само ако законите важат подеднакво за сите, вклучувајќи нè и нас кои сме најодговорни за нивното спроведување“, додаде тој.
