Опозициската Социјалдемократска унија на Македонија (СДСМ) најави дека ќе поднесе претставка до Уставниот суд за неодамна усвоената собраниска резолуција со која се осудуваат, како што е наведено, „манипулациите на опозицијата околу прашањето за мигрантите“.
Од СДСМ соопштија дека резолуцијата е спротивна на Уставот и дека претставува преседан со кој, според нив, се нарушуваат принципите на парламентарната демократија и слободата на политичко дејствување.
„Во демократска држава, парламентот не носи резолуции против опозицијата. Ова е опасен преседан кој ја заменува демократската дебата со политичко етикетирање“, изјави пратеничката и потпретседателка на СДСМ, Јована Тренчевска.
Резолуцијата беше усвоена со гласовите на парламентарното мнозинство предводено од ВМРО-ДПМНЕ и се однесува на јавните настапи на опозицијата поврзани со прашањето за мигрантите.