Собранието на Северна Македонија денес го усвои Буџетот за 2026 година по повеќе од 48 часа расправа. Буџетот беше поддржан од 71 пратеник, додека 14 гласаа против.
Владата проценува дека вкупните расходи за 2026 година ќе изнесуваат 6,78 милијарди евра. Според проекциите, растот на бруто-домашниот производ идната година се очекува да достигне 3,8%, а инфлацијата да се движи околу 2,5%. Буџетскиот дефицит, според Министерството за финансии, треба да продолжи да се намалува, додека јавниот долг да се стабилизира.
Опозицијата оцени дека Буџетот содржи „нереални проекции“ и дека е изготвен со политички мотиви.
Министерката за финансии Гордана Димитриеска-Кочоска изјави дека документот е подготвен со „јасна визија и одговорен пристап кон јавните финансии“.
„Буџетот за 2026 година се темели на остварени економски резултати и очекувања за продолжување на позитивните трендови. Целта е одржлив развој, редовно функционирање на институциите и навремена исплата на сите обврски“, рече таа, додавајќи дека секој денар мора да биде насочен кон највисок поврат за граѓаните.
Од вкупно околу 200 поднесени амандмани, усвоени беа шест. Меѓу проектите што ќе добијат средства е и изградбата и реконструкцијата на спортската сала во основното училиште „Гоце Делчев“ во Гостивар.