Најмалку уште четири земји во неделата соопштија дека Соединетите Држави ги поканиле да се приклучат на новиот „Одбор за мир“ на американскиот претседател Доналд Трамп, тело кое треба да ги надгледува следните чекори во Газа и кое покажува амбиции за поширока улога во глобалните прашања.
Според американски функционер запознаен со нацрт-повелбата, кој зборуваше под услов на анонимност, придонес од 1 милијарда долари обезбедува постојано членство во одборот, наместо мандат од три години, за кој не е предвиден финансиски услов. Повелбата сè уште не е објавена, а средствата, според истиот извор, ќе бидат наменети за обнова на Газа.
Се очекува одборот да биде составен од светски лидери, а САД во наредните денови да ја објават официјалната листа на членови, најверојатно за време на Светскиот економски форум во Давос, Швајцарија.
Јордан, Грција, Кипар и Пакистан во неделата соопштија дека добиле покани за членство. Претходно, Канада, Турција, Египет, Парагвај, Аргентина и Албанија потврдија дека исто така биле поканети. Не е јасно колку вкупно земји добиле покана.
Членовите на одборот ќе ги надгледуваат следните фази во Газа, додека примирјето што стапи на сила на 10 октомври влегува во својата втора, посложена фаза. Планот вклучува формирање нов палестински комитет во Газа, распоредување меѓународни безбедносни сили, разоружување на Хамас и обнова на разурнатата територија.
Во писмата испратени во петокот до светските лидери, со кои ги поканува да бидат „основачки членови“, Трамп наведе дека Одборот за мир ќе започне „смел нов пристап кон решавање на глобалните конфликти“.
Иницијативата потенцијално може да се наметне како ривал на Обединетите нации, чијашто улога е ослабена поради значителни намалувања на финансирањето од администрацијата на Трамп и други донатори. Воедно, најмоќното тело на ОН – Советот за безбедност – беше блокирано од американски вета во обидите да се стави крај на војната во Газа.
Во поканите се наведува дека Советот за безбедност го одобрил американскиот план од 20 точки за примирје во Газа, кој предвидува и формирање на Одборот за мир. Дел од писмата беа објавени на социјалните мрежи од земјите што добиле покана.
Белата куќа минатата недела соопшти и состав на извршен комитет кој треба да ја спроведе визијата на Одборот за мир, но Израел во саботата реагираше дека комитетот „не бил координиран со Израел и е спротивен на неговата политика“, без да даде дополнителни детали – редок критички став од блискиот сојузник на Вашингтон.
Во извршниот комитет се вклучени американскиот државен секретар Марко Рубио, пратеникот на Трамп Стив Виткоф, зетот на Трамп Џаред Кушнер, поранешниот британски премиер Тони Блер, претседателот на Светската банка Аџај Банга и заменик-советникот за национална безбедност на САД Роберт Габриел, како и израелскиот милијардер и бизнисмен Јакир Габај.
Меѓу членовите се и претставници на земјите кои го надгледуваат примирјето – Катар, Египет и Турција. Турција има затегнати односи со Израел, но одржува добри врски со Хамас и, според аналитичарите, би можела да одигра важна улога во убедувањето на групата да се откаже од власта во Газа и да се разоружа.