Антивладините протести во Иран ескалираа во четвртокот навечер, при што илјадници демонстранти излегоа на улиците на Техеран и други градови, а властите воведоа драстични ограничувања на интернет-пристапот, според снимки на социјалните мрежи и извештаи на набљудувачи.
Видеа објавени на интернет покажуваат запалени возила и судири меѓу демонстрантите и безбедносните сили, кои, според очевидци, употребиле солзавец за растерување на толпата. Новинската агенција АФП јави за масовни собири и во западноиранскиот град Абадан.
Медиуми во егзил што емитуваат на персиски јазик објавија снимки од протести и во други делови на земјата, меѓу кои северниот град Тебриз и религиозниот центар Машхад. На некои од снимките се слушаат повици за уривање на Исламската Република, како и извици во поддршка на Реза Пахлави, син на поранешниот ирански шах соборен во 1979 година.
Во Техеран, жители извикувале пароли од балконите, меѓу кои „Смрт за диктаторот“ и „Смрт за Исламската Република“, изјавија очевидци за Асошиејтед прес.
Државните медиуми за првпат известија за протестите, обвинувајќи „терористички агенти“ поддржани од САД и Израел за поттикнување насилство и подметнување пожари, без да понудат докази за тврдењата.
Протестите траат веќе 12 дена и започнаа на 28 декември, поттикнати од незадоволство поради високите трошоци за живот и тешката економска состојба. Собири се регистрирани во најмалку 50 градови и населени места, претежно во западниот дел на земјата.
Организацијата НетБлокс со седиште во Лондон соопшти дека Иран се наоѓа во „речиси целосен национален интернет-блекаут“, додавајќи дека властите ги прекинале и меѓународните телефонски врски, што значително го отежнува контактот со земјата.
Во меѓувреме, американскиот претседател Доналд Трамп ги повтори претходните закани кон иранските власти, велејќи дека САД „ќе постапат остро“ доколку дојде до убиства на демонстранти, во изјава дадена за конзервативниот радио-водител Хју Хјуит.