Лидерот на опозицискиот СДСМ, Венко Филипче, денеска остро го критикуваше премиерот Христијан Мицкоски, оценувајќи дека неговото учество на Светскиот економски форум во Давос било без конкретни дипломатски резултати и дека земјата се соочува со најголема меѓународна изолација во поновата историја.
Филипче изјави дека додека граѓаните се соочуваат со економски тешкотии, премиерот престојувал во Давос без да оствари значајни средби. „Македонија е во дипломатска изолација, европскиот пат е блокиран, а Владата нема план“, рече тој.
Филипче оцени дека Владата ја оддалечува земјата од Европската Унија и ја турка во политичка и економска неизвесност, додавајќи дека, според него, надворешната политика е водена без јасна стратегија и со зависност од регионални политички центри.
Тој упати критики и за застојот во евроинтеграциите, наведувајќи дека нема политичка волја за спроведување на уставните измени и реформската агенда, што, според него, е предуслов за продолжување на преговорите со ЕУ. Филипче истакна дека од најавените реформски закони е донесен само еден, и тоа со, како што рече, делумна примена на европските препораки.
Осврнувајќи се на протестите на камионските превозници и блокадите на граничните премини, Филипче изјави дека граѓаните и економијата ќе ги почувствуваат директните последици од новиот електронски систем на Европската Унија за контрола на влез и излез, додавајќи дека над 60% од македонската економија е поврзана со пазарот на ЕУ.
На седница на Националниот совет за евроинтеграции, Филипче го критикуваше министерот за транспорт Александар Николоски, оценувајќи дека предупредува за можен економски удар, но не презема конкретни чекори за надминување на проблемот.
Во меѓувреме, пратеникот на ВМРО-ДПМНЕ, Антонио Милошоски, побара од амбасадорот на Кипар во Северна Македонија, Андреас Фотиу, протестите на превозниците да бидат ставени на дневен ред во Брисел, за време на презентацијата на приоритетите на кипарското претседателство со Европската Унија.
Филипче изрази загриженост и за, како што рече, антиевропските практики на Владата, вклучително и односот кон медиумите, состојбите во правосудството и надворешнополитичките пораки, оценувајќи дека земјата намерно се маргинализира од европските процеси.