Претставници на Стопанската комора на Северозападна Македонија одржаа официјална средба со амбасадорот на Швајцарската Конфедерација во Северна Македонија, Кристоф Зомер, на која беше разговарано за зајакнување на билатералната економска соработка и улогата на приватниот сектор, соопшти Комората.
На средбата учествуваше и Џемаил Даути, почесен претседател на Комората и раководител на компанијата „Даути Комерц“.
Според соопштението, разговорите биле насочени кон можностите за зголемување на трговската размена меѓу двете земји, реализација на заеднички проекти и создавање поволна клима за нови инвестиции. Учесниците разговарале и за усогласување на домашните компании со европските стандарди и јакнење на нивната конкурентност на меѓународните пазари.
Посебно внимание било посветено на улогата на дијаспората од Северна Македонија во Швајцарија, која беше оценета како значаен фактор за поврзување на економските интереси и пренос на знаење и деловно искуство.
Стопанската комора на Северозападна Македонија соопшти дека ќе продолжи да ги поддржува иницијативите насочени кон зголемување на извозот и зајакнување на присуството на домашните компании на европските пазари. Податоците за трговската размена меѓу Северна Македонија и Швајцарија, според Комората, укажуваат на потенцијал за понатамошно продлабочување на економската соработка.