Огранокот на Движењето Беса во Кичево доби привремено раководство по разрешувањата на локалното раководство, што предизвика конфликт меѓу претседателот на партијата Билал Касами и членот на Централното собрание Фатмир Лимани.
Лимани го презеде огранокот и ги разреши претходните раководители, вклучувајќи го претседателот на огранокот Агим Садику, секретарот Реџеп Асани и членовите на раководството Бејтула Емини и Валбона Адили Емини, поради неактивност и кршење на статутот.
За привремени раководители до наредното собрание се именувани потпретседателите Кастриот Рамадани и Ајхан Сулкоски, луѓе блиски до Лимани.
Од друга страна, крилото на Касами не ги признаваат измените. Велат дека огранокот на Движењето Беса во Кичево, предводен од претседателот Садику, секретарот Асани и членовите на раководството Валбона Адили Емини и Бејтула Емини, како и останатите членови, ја почитува одлуката за мораториум на партиските активности, со цел спојување на ВЛЕН во еден субјект.
Тие потсетуваат дека на Централното собрание на Движењето Беса одржано на 12 февруари 2026 година, беше разрешено раководството на партијата, а претседателот Билал Касами доби мандат да продолжи со разговорите за иднината на ВЛЕН. Во рамки на истата седница, партијата вели дека бил разрешен и членот на Централното собрание, Фатмир Лимани, кој денеска објавил соопштение без законска основа во името на огранокот во Кичево.
Од партијата оценуваат дека неодамнешните обиди за нарушување на процесот се мотивирани од надворешни фактори, со цел да се нанесат штети на Движењето Беса и на процесот на спојување на ВЛЕН. Како што нагласуваат, слични обиди биле регистрирани и во минатото, но секогаш биле неуспешни и се очекува да останат такви и во иднина.